Rumasta ja kauhniista: Johan Turi, Outi Pieski ja Johanna Minde

Ensimäistä kertaa kohta sathaan vuotheen koothaan näyttely kokhoon, missä oon lekentaarisen monitaiteilijan Johan Turin (1854–1936) kuvia. Hänen muistellut elämästä ja perintheistä pohjoisessa Sápmissa kohtaa tässä taiteilijan Outi Pieskin veistämisen, valokuvvauksen ja maalauksen niinku duojárin Johanna Minden. Näitä taiteilijoita yhistää syvä tuntemus saamelaisesta kulttuurista ja lähheinen suhte maihin ja kaikkiin siihen mitä sielä ellää.

Turia piethään ensimäisenä saamelaisena kirjailijanna, joka kirjotti saamelaisesta elämästä omala äitinkielelä. Vuona 1910 julkasthiin hänen kirja Muitalus sámiid birra (Kirja saamelaisten elämästä) pohjoissaamen kielelä ja tanskaksi. Seittemän vuotta jälemiteen kirja tuli ruottiksi. Turi kirjotti kirjan Köpenhamnilaisen taiteilijan ja kirjailijan Emilie Demant Hattin avulla muutaman kuukauen aikana pienessä tuvassa Duortnosjávrin/Tornionjärven rannala. LKAB:n ensimäinen tispunäntti Hjalmar Lundbohm rahotti kirjan julkasemisen.

Kirja sisältää maalaavia kertomuksia esimerkiksi poronhoijosta, jahista, pyynistä, uskosta, paranuskonstista, kläpitten synnytyksestä, joikusta ja Turin riitauksia viehreisessä atlaksessa. Se oon teksti joka ylittää genre rajat ja pohjautuu hänen kokemukshiin elämästä poronhoito-perheessä nykyisen Giron/Kierunan ja Duortnosjávrin/Tornionjärven ympärillä. Kirja rakentuu saamelaisten omhiin tietoihin ja yhistää antropologian, folkloristiikan, histuurian ja kirjalisuuen. Ja samala tavalla hahmottuu olemassaolo Outi Pieskin taiteelisuessa elävänä väävinä täynnä ihmisiä, elukoita, muistoja ja perittyä tietoa. Puetin nuukuuella ja feministisellä voimala hään köyttää yhtheen saamelaisten perintheet tämän aikakauen kysymyksihin kolonialismistä, kulttuuritten jatkuvuesta ja klimaattikriisistä. Arkitehtin ja duojár Johanna Minden osa näyttelyssä oon kekseliäs puusta tehty palli, jonka Turi oon keksiny ja joka kertoo Turin praktisesta luonosta.

Turi jatko kirjottamista ja piirtämistä läpi elämän ja oli kautta maan tunnettu vanhoina päivinä. Näyttelyssä oon matkassa kolme hänen kuvatypistä: kertovia nuukasti käsin tehtyjä riittauksia, leimoila tehtyjä kuvia, joita hään myi tyristile ja ekspresiiviä piirustuksia ja maalauksia myytti-, ja unimaailmasta. ”Rumasta ja kauhniista” oon Turin omat sanat, jokka kertova hänen käsityksestä ette kaikista pittää kertoa, sama sitten jos se oon rummaa eli kaunista.

Harald Gaski, saamelainen kirjalisuientietäjä, professoria ja kirjailija Deatnu/Taanassa, oon neuvonantaja tälle näyttelylle, joka oon osa Kin:in monivuotista lankaa Kriittinen piiri ja Käsi, syän ja aivot.

Kuva 1: Johan Turi
Kuva 2: Outi Pieski
Kuva 4: Johan Turi
Kuva 3: Outi Pieski